لعبة كرسي الاعتراف !!!!!

-دوللي وموون لذاذ جدا ودوللي اسئلتها كانت حلوة بس للأسف انا متشرفتش بالعب معاهم وخصوصا موون اتمني نتعرف اكتر
-عرفت المنتدي من شوشو بنت خالتي ,واول التعارف كان لاف بوي وبعدين لانا وبعدين امولا وبعدين عمر وبعدين برنس المكتئبينى وسنسن وهكذا واتمني نبقي كلنا اصحاب يارب
-افلام الخيال العلمي والافلام الهندية
-بحب الدراما التركية والمصرية شوية صغيرين وبحب الدراما الايرانية وخصوصا مسلسل يوسف الصديق ومريم العذراء

السلام عليكم

انا مش بدخل اللعبة دى كانت مرة وحدة وما كملتش

بس سنو حبيبتى وعايزة اعرفها اكتر


تعرفى احلى صفة فيكى وايه مش حلو ؟

الحب بيمثل ليكى ايه ومين تؤام روحك ؟

بحس انك حزينة التفاؤل والتشاؤم مرتبطين عندك بحاجة ؟

لو مسكتى منصب مهم فالبلد ايه اول حاجة هتعمليها ؟

فى حاجات فحياتك نفسك تحذفيها ؟

لو ممكن يرجع الزمن اى فترة هتختارى ترجع ؟

لما بتتظلمى او تتجرحى بتسامحى بسرعة ولا بتاخد موقف ؟

بتفكرى فالشغل بعد التخرج ولا مش اوى ؟

اكلتك ولونك المفضلين ؟

اتمنى اكون مذيعة خفيفة عليكى

حاجة اخيرة

بعتلك رسالة عالخاص اتمنى تشوفيها واعرف ردك

وربنا يوقفك يا قمر ويوفق الجميع

اكللتها المفضله معروفه طبعا
شوربه حشرات مع سلطع قواقع مع عيش الغراب
ومتقلقيش انا لا رومانسي ولا عيني زايغه
وعلي فكره مسلسل يوسف الصديق كله غلط فغلط
اخناتون ملهوش دعوه بالليله اصلا سيدنا يوسف كان فعصر الهكسوس
الاسرات 15 و16 و17 اخناتون كان فالاسره 18 يعني بعده بمئات السنين
حبيت افطمك عالليله بس عشان متشربيش المقلب

اكمل رد علي راشد معلش يا سنسن
-اكلتي المفضلة يا بيه يا بتاع التريقة يا هادي يا غلبان هي المكرونة بالبشاميل والفراخ علي صينية بطاطس في الفرن
-بحب السهر خصوصا في الصيف ولكن انا بدخل المنتدي متأخر عشان بيبقي ورايا شغل البيت ونفسي اعرف الوقت اللي بتدخل فيه انت وسنسن بالظبط

يارب ردودي تعجبك يا برنس وشكرا علي الاسئلة الحلوة

سنس حبيبتي بقي /
-احلي صفة فيا اني مش بشيل من حد لما يزعلني بسامح بسرعة
-الاوحش اني عصبية جدا
-الحب بالنسبالي كلمة كبيرة واغلب الناس مش فاهمة معناها وانا منهم
-توأم روحي هي امي وبعدها أختي
-انا حزينة بسبب حال الدنيا والناس وحشين اوي
-التفاؤل والتشاؤم ولا حاجة بالنسبالي
-لو مسكت منصب مهم أول حاجة اعملها احاول اوفر عيش نضيف وأزود مرتبات الموظفين وأرخص سعر اللحمة
-نفسي احذف كل حاجة وحشة حصلتلي طبعا
-اختار أرجع طفلة صغيرة تاني عشان كل حاجة وقتها كان ليها طعم
-بسامح بسرعة بس لو غلطة كبيرة قوي باخد موقف طبعا
-بصراحة انا شايفة ان فرصة شغلي أولي بيها ولد ولكن قراري الاخير عن الشغل علي حسب ظروفي
-المكرونة بالبشاميل
-وافضل اللون البني
-شكرا ياسنسن علي الاسئلة الحلوة دي ربنا يوفقك
-

فرصه شغلي اولي بيها ولد
قراري الاخير هيبقي علي حسب ظروفي
مش بقولك اعقل بنت شوفتها هنا
وكمان ايه طلعت بتحب المكرونه بالبشاميل زيي والفراخ
ده غير انها فسنه رابعه برضه زيي
زي ما يكون القدر بيزقنا ناحيه بعض عاوزنا نخبط فبعض
وان شاء الله نخبط واكون انا راكب كساح اسكاني
وهيه توك توك
قوليلي يا سنو
وسيبك من ان دي لعبه كرسي اعتراف
احنا نتناقش بالهداوه ...... قولتي انك عرفتي المنتدي من بنت خالتك هيه بقي عرفته ازاي؟ (حشري انا)
بما انك عاوزه تنزلي اسعار اللحمه وكدا تفتكري الاسعار دي هل هيه فحد ذاتها مشكله ؟ ولا لانها مش متوافقه مع الدخل ومسوتي المعيشه للافراد ....احب اسمع رايك هتعملي ايه علشان تنزلي اسعار اللحمه وتوفري عيش كويس ايه هيه الحلول اللي فدماغك ....!!!!

مساء القشضة يا ابو الرشد
-أولا /شكرا ان كلامي عجبك وانك شايفني عاقلة بس هي دي فعلا وجهة نظري
-ثانيا/ انا معرفش بنت خالتي عرفت المنتدي منين بس هي بتحبو أوي وخلتني انا كمان أحبه
-ثالثا/الاسعار عليت بغباء لكن ممكن نقول انها مش بتشكل أزمة لاصحاب الدخول المرتفعة لان اساسا قدرتهم الشرائية عالية
لكن بص علي الموظف الغلبان اللي بيفرح كل أسبوع بكيلو اللحمة اللي بيشتريه لعياله وفي الغالب مش بيكفي أكتر من يومين لاسرة مثلا خمس افراد
-رابعا / بالنسبة للحلول بصراحة مفيش حاجة معينة في دماغي دلوقتي لان الحلول دي بتبقي وفق خطط صعبة جدا
وأكيد انا مش حاطة خطة ولا خمسية ولا عشرية في دماغي في الوقت الحالي لكن ممكن نفكر سوا في حلول مع ان الموضوع مش سهل
مااشي يا أبو الرشد اديني بطلت أقولك يا بيضة

برافو يا سنو ردودك فعلا عاقله اوي وعجباني
بس انا قصدي ارتفاع الاسعار ده صاحبه ارتفاع دخول برضه
يعني بصي لحال البلد ...لإي تقدم اينعم هوا بطيء ومش هيوصلنا لمستوي الدول التانيه لاننا علي ما نوصل لتقدمهم هيكونا هما سابولنا الكوكب وراحو عاشو فالمريخ .... انما الاسعار مش ممكن هتفضل زي ما هيه العمر كله اكيد هترتفع طبعا .... وانا كل ما انزل اجيب لحمه اقول اكيد هروح عند الجزار هلاقيه بينش واول ما ادخل يجري عليا ياخدني بالحضن ويقولي يا برنس الليالي يا رمانه المزان ...فينك من زمان ؟؟؟!!! .....اروح الاقي الدنيا هلاك وكانه بيوزع اللحمه ببلاش للناس كلها الا انا يعني الناس معاها فلوس تشتري .....افتكر ان ده معناه ارتفاع مستوي المعيشه مش بس خلاء انا جدتي دايما تقولي زمان كانت الدنيا رخص بس محدش معاه فلوس دلوقتي الدنيا غلا بس كل الناس بتشتري كل حاجه !
ولا انتي مش معايا ؟؟؟
اهو بطلت اقولك يا مكعب التلج

ههههههههههههههه

حلو الحوار بتاع الجزار ده

بصراحة انا معاك عندك حق الناس مش بتبطل تشتري وده بيخلي الحكومة تعلي الاسعار براحتها

اسالتى لسنو
1- اسم باباكى ايه ؟
2- سنك ؟ وكليتك ؟ وقسمك ؟
3- ارخم دكتور درسلك لغاية دلوقتى مين ؟ واحلى دكتور مين ؟
اخبار شوشو بنت خالتك ايه ؟
4- متى حسيتى انك ولا حاجة ؟
5- متى ياستى ؟
6- حبيتى قبل كدا والحب بالنسبة ليكى ايه ؟
7-لو العمر رجع بيكى هتغيرى ايه فى حياتك ؟
8- ندمتى كام مرة فى حياتك وليه ؟
9- ممكن تحللى شخصيتك ايجازا ؟
10-ايه رايك فى اعضاء المنتدى البارزين وياترى قابلتى حد فيهم قبل كدا ؟
11- ماهى معنى الصداقة بالنسبة ليكى ؟
12- المال - الحب - الشهرة - السلطة - الصداقة ممكن ترتبيهم حسب الافضلية بالنسبة ليكى ؟
13- اهلاوية ولابعيد الشر ؟ ومين احسن لاعب فى مصر بالنسبة ليكى بعد ابو تريكة طبعا ؟
14- لو انتى مكان ( سوزان مبارك - احمد نظيف - ابو علاء - نجيب سويرس - عمر ) هتعملى ايه لو مكان كل واحد فى دول ؟
15- ايه رايك فى كلية سياحة وفنادق واتحادها وفى دفعة سنة رابعة
بمختلف اقسامها ؟
16- بتحبى بلدك الا بالحق انتى من فين ؟ وياترى بابا ولا ماما بتحبي اكتر ؟
سلميلى على اخوكى محمد وماااااااااااااااااااااااااااااء !!!!!!!!

جميل اوى
ده انا فاتتنى حجات كتير اوى
عموما جاوبى على اسئلة عمر
وبعدين هسال ان شاء الله

1\اسم بابا قالي متقوليش عليه لحد هههههههههههههههه
2\عشرين سنة كلية السياحة والفنادق قسم الدراسات السياحية
3\بصراحة مفيش انا بحبهم كلهم مفيش حد رخم بس أحلي دكتور هو د\ايمن منير
4\شوشو رايقة الله يخليك
5\حسيت اني ولا حاجة فمرة ماما زعلت مني
6\عمري ما يأست دايما بحاول اوصل وبعدين انا صغيرة لسة والعمر قدامي هيأس ليه لسة شوية
7\عمري في حياتي ما حبيت ومش هيحصل والحب لا شئ بالنسبالي وقلت ده ميييت مرة
8\لو العمر رجع هغير كل لحظة غلط فيها في حق أغلي الناس هما ماما وبابا
9\ندمت مرة واحدة اني مذاكرتش اكتر في ثانوي عشان أدخل السن حلم حياتي
10\عصبية طيبة في حالها تتكلم في اللي يخصها مش علي الفاضية والمليان كلام موسوسة بتحب الناس
11\اعضاء المنتدي حلويين جدا ولذاذ بس لسة ما قابلتش حد
12\الصداقة حاجة مهمة جدا في حياتي مقدرش استغني عنها ابدا ودايما بحاول احافظ عليها

13\الصداقة-السلطة-المال-الشهرة -الحب
14\انا اهلاوية جداأحسن لاعب بالنسبالي أحمد حسن
15\سوزان مبارك\البس الحجاب واتلم واقعد في البيت
احمد نظيف\اقدم استقالتي فورا واحاول ابقي نظيف
ابو علاء\اتحني بقي هو واخد مصر احتكار ولا تكية ابوه
نجيب سويرس \اهج من البلد واغير رقم تليفوني
عمر\ادخل المنتدي كتير
16\كلية كويسة شوية اتحادها مالوش لزمة ودفعة طين بكل أقسامها
17\بحبها طبعا انا من المنيا مركز المنيا
بحب ماما وبابا زي بعض بس انا قريبة من ماما كتر
تعرف اخويا منين ولا ده علي اعتبار ان 99,99% من شباب مصر اسمهم محمد
شكرا ياعمر علي اسئلتلك يارب ردي يحوذ اعجابك

الاسبوع انتهي تقريبا
نختار حد تاني بقي
ترشحوا مين؟

سناء

لا عضو يكون جديد احسن

احمد

إسألوني أنا يحيي
عايز حد اتكلم معاه
وإن شاء الله هجاوب بكل صراحة
مهما كانت الأسئلة

اوكيه يا جماعة نختار يحيي

هاه يللا اسألوا بس شوشة شوية
عشان اعرف اجاوب؟

يحيي
عندك كام سنه
منين
اسرتك بتتكون من كام فرد
ايع طبيعه عملك
ايه اهتماماتك
ايه اللي شدك فالمنتدي ( غيري طبعا )
ايه اللي مش عاجبك فالمنتدي (غير سناء طبعا)
احكيلنا موقف طريف حصلك ايام دراستك
كانت ايه اخبارك مع البنات فالمدرسه يا وااااااد؟؟؟؟؟ يا خطر انته يا خطر هاه؟
مقيم فين فالسعوديه

اسمك الحقيقي يحيي ولا ده تمويه

بتدخن ولا بتحشش
بتفضل اي وقت فاليوم
بتفضل اي يوم فالاسبوع
بتفضل اي شهر فالسنه
بتفضل اي سنه فعمرك
مين اكتر شخصيه تاريخيه معجب بيها
نكتفي بهذا القدر
اتفضل امضي علي اقوالك وروح لما نعوزك هنبعتلك

عندك كام سنه
يوم 22/2/2011
أكمل ال 24
منين
أسوان

اسرتك بتتكون من كام فرد
حاليا 6 بأبويا وأمى

ايع طبيعه عملك
محاسب

ايه اهتماماتك
يعنى بهتم جدا بالسيارات علي الرغم انى معنديش خبرة فيها وحاليا بتعلم السواقة وبحب أسمع الاخرين واخفف عنهم همومهم

ايه اللي شدك فالمنتدي ( غيري طبعا )
جو الجامعة

ايه اللي مش عاجبك فالمنتدي (غير سناء طبعا)
ما فيش حاجة مش عاجبانى ونفى النفى اثبات (لغة عربية هههههههه)

احكيلنا موقف طريف حصلك ايام دراستك
موقف طريف ومخجل في نفس الوقت
أنا عموما ما بحبش المعاكسات والمرة الوحيدة اللى غلط وعاكست فيها كالتالى :
كنا واقفين انا والشلة وقالوا يللا نعاكس كل واحد عاكس واحدة واللى عاكس مجموعة المهم أنا بقي عاكست مين
واحدة أمورة عسولة يعني من الاخر وبصتلي وحفظت شكلى كويس
المهم خلصنا ورحنا ندخل المحاضرة اللى علينا كانت سكشن ترجمة
أبص ألقالك الموزة اللى عاكستها داخلة المدرج بتعمل ايه ؟
المعيدة اللى هتدينا السكشن ما أقولكشي غطست لتحت لغاية السكشن ما خلص ,ايه اللى حصل بقي قبل ما تطلع قالت خلاص أنا ماشية المستخبي يطلع وجردل ميه ساقعة نزل علي دماغى وبس


كانت ايه اخبارك مع البنات فالمدرسه يا وااااااد؟؟؟؟؟ يا خطر انته يا خطر هاه؟
أنا عموما ما بحبش أكسف حد والخصلة الطين اللى فيا انى بجامل الناس وخصوصا .... انت عارف بقي

مقيم فين فالسعوديه
الرياض

اسمك الحقيقي يحيي ولا ده تمويه
الحقيقي

بتدخن ولا بتحشش
كنت بدخن ومبطل بقالي شهر دلوقتى الحمد لله

بتفضل اي وقت فاليوم
النص ساعة اللى قبل النوم

بتفضل اي يوم فالاسبوع
الخميس

بتفضل اي شهر فالسنه
شهر 2 لأنه شهرى وبعدين الجو بيكون حلو

بتفضل اي سنه فعمرك
السنة اللى هحقق فيها أكبر قدر من طموحاتى
ممكن طموح واحد بس تنبني عليه الباقى

مين اكتر شخصيه تاريخيه معجب بيها
سيف الدين قطز

شقي يا يحيي شقي

مين اللى عليه العين
عايزين حد ولو حداية مش مشكلة برده