أنا مش ضعيف ولا ؟؟؟؟

الموضوع يا جماعه وبإختصار ، هو إني مش عارف سبب لحزني وخوفي وإكتئابي طول الوقت

وكتير بحس إني ضعيف ، وماليش مكان في الدنيا اللي بقت زي الغابه ، مش ببقي عارف في أوقات كتيره أعمل إيه ، حتي أعز اصحابي في وقت الضيق ساعات كتير مش بلاقيهم جنبي ، وكمان في حاجه فيا أنا شايف إنها عيب الزمن دا وهي الطيبة وحسن النية ، لأني دايما بتعامل مع الناس بالمبدأ دا لكن للأسف كله بييجي عليا في الآخر ، حتي لما فكرت أحب من كام سنه ، كنت دايما بحاول أعمل المستحيل علشان أسعدها ، ربنا يسامحها بقه عالي عملته
لقيتها باعتني في اول وأقرب موقف وبكل سهوله وكأن مش هي دي الإنسانه اللي حبيتها ، خانت كل الوعود وماحبتش بعدها لحد النهاردة وبرضو قلت الحمد لله
بس الناس اللي ماتعرفنيش تفكرني فرحان لأني بحاول أضحك علشان الهموم اللي جوايا ما تبانش ، لكن اللي قريب مني أوي عارفني
والحمد لله إن ربنا عطاني موهبة كتابة الاغاني ، فبقدر أكتب كل اللي تاعبني في الأغاني ، ولولا الموهبة دي كنت مت من زمان لكن برجع وأقول الحمد لله
يمكن تكونو مش فاهمين أنا أقصد إيه ، بس عادي لأني ساعات كتير ببقي مش فاهم نفسي
والسؤال .. هل الحزن والخوف والطيبة وحسن النية دا ضعف مني ولا دا إيه ؟ ياريت تجاوبوني وبصراحة

بالعكس يا صحبي الطيبة وحسن النية دي حاجة حلوة أوي بس للأسف متنفعش ف زمنا ده
ومشكلتك انك مخلص أوي زيادة عن اللزوم فنصيحتي من باعك بيعه يبني واشتري اللي يشتريك
وان كانت ف لحظة سابتك عشان اي سبب فإنت مش قدامك اي سبب يخليك تتمسك بحبها

وحاجة حلوة انك تخرج كل الاحزان والهموم ف الشعر
ع الاقل بتلاقي حد ينفذ اللي انت عايزة وبيعبر عن كل اللي جواك
وكفاية انه الصديق الوحيد اللي بتلاقيه ف الوقت اللي انت عايزة

اتمنالك كل خير يا صحبي وربنا يرزقك باللي تسهرك الليالي قريب ان شاء الله
وتنسيك كل الاحزان والهموم وتفتح صفحة جديدة مع الحياة
صفحة كلها أمل صفحة كلها تفاؤل صفحة كلها حب ف حب
تقبل تحياتي يا ابوصابر

كتب/الواد ميلانو ههههههه

فى الاول احب اقولك ان المؤمن كيس فطن مش كيس قطن يعنى انت عندك صفة جميلة قوى بس المشكلة هنا مش فى الصفة دى , لكن المشكلة فى استخدامها يعنى انت لازم تعرف انت بتستخدمها مع ناس تستحق ولا لاْ ؟ وساعتها هتعرف تعيش كويس من غير اى تعب ومع ذلك مش هتكون غيرت اى حاجة من صفاتك اللى ربنا خلقك بيها واللى لازم تحمد ربنا عليها وتبصلها على انها نعمة مش نقمة . وبالنسبة للبنت اللى بتقول انك حبيتها من كام سنة , انا عن نفسى يمكن انت حبيتها بجد اوكى لكن الكلام دة كان وانت عندك كام سنة ؟نقول 17 او 18 وبس فى السن دة الواحد مابيبقاش مستقر على حاجة معينة واغلب القصص فى الوقت دة بتكون فشنك ما تزعلش منى ) بس هية دى الحقيقة . وعلشان كدة لازم تبص لمستقبلك علشان لما تلاقى ان شاء الله اللى تتمناها تكون جاهز للتقدم ليها و خطوبتها باذن الله وخليك مع ربنا دايما وتحمد ربنا انة خلصك من القصة دى لانة ما كانش هيبقى راضى عنها وافتكر .قول الله عز وجل ( ولا متخذات اخدان ) صدق الله العظيم ودايما ادعى ربنا انة يرزقك بانسانة من نفسك صالحة ان شاء الله . يارب اكون افدتك. ومعلش على الاطالة

بصراحه أنا مش عارف اقولكو إيه ومقتنع بردودكم تماما

ميلانو **** اللي اكتر من أخويا مع إني لسه يا دوب عارفك ، بشكرك علي نصايحك الجميله دي ، وعلي إهتمامك بيا وبمواضيعي
وبشكرك كمان علي المرور الطيب العطر

safaaqaed

أشكرك علي مرورك وتعليقك واهتمامك ونصيحتك وثقافتك ولباقتك ، وبصراحه معاكي حق في كل حاجه ، ولو أني مش مقتنع بقصة إني كنت لسه صغير لأني كنت بحب الإنسانه دي جامد جدا ، بس في حاجه أنا ملاحظها إنكو كلكو جبتو سيرة الموضوع دا مع إن مش هو السبب الوحيد للي أنا فيه ، يارب تكونو فهمتو وجهة نظري
وشكرا مره كمان علي مرورك

شاااااااااعرنا الجميل

اكيد هرد عليك بس اكون مصحصحة عن كدة

لاني هناااام

تقبل مروري لحين العووودة

مع كل احترامى للكلام اللى اتقال و اللى لسه هيتقال بس ده يا ابوحميد كنت بعانى منه زيك بس الحمد لله اتغيرت جامد
اللى بتعانى منه ده سببه حاجتين اول حاجه الفراغ
انت لو شاغل وقتك بحاجات حاسس انها مهمه مش هتحس بالضيق ابدن

تاني حاجه انت ف فنادق لو جربت تشتغل ف فندق زييا من اول يوم ليك فى الشغل هتسيب البراءه دى والطيبه على جنب وهتلاقى نفسك والله بجد بقيت شخصيه تانيه لازم تعرف اللى قدامك بيفكر ازاى انسى حسن النيه ده خالص بس متشكش ف كل حاجه
الشغل اه هيموت فيك صفات جميله بس هيحيى فيك صفات تخليك تقدر تتعايش مع المجتمع

طولت عليك بس الحل ده عن تجربه شخصيه

إيجبت .....أوكي وأنا في إنتظارك

savico

أنا بشكرك يا صاحبي علي الإضافة الجميلة دي ، والنصيحة الغالية

وربنا يبعت الشغل بقي ، علشان أعمل زي ما بتقول

وشكرا ليك مره كمان لأنك أفدتني

شاعر الشباب
بص انا مش هختلف مع وجهات النظر اللى اتقالت
وكلها لها احترامها ووقارها.......
وجهة نظرى..الطيبة وحسن النية دول اقوى حاجتين ف الانسان
لانى لو فى واحد من غير لا طيبة ولا حسن نية اكيد ده مش بني ادم
وحد مجرد من الاحساس
شوف يا سيدى......
انت لما تتعامل مع حد بحسن نية وطيبتك اكيد الى انت بتتعامل معاه ده
هيقدر ده فيك وعمره مهيخدعك ولا يضحك عليك..
دا ف حالة لو انسان مش هقول زيك بس ع الاقل عنده ضمير حبتين
يعنى المشكلة مش فيك يا شاعر المشكلة ف اللى قدامك....
يا ترى هيقدر ده فيك ولا لاء..
يبقى انا عشان اتجنب ده من ومع حد معرفوش
المفروض اتعامل معاه بحذر ف البداية لحد متأكد من شخصيته كويس
واقدر اتحقق منه اكتر
طلع كويس هعامله بكامل فطرتى وطبيعتى الطيبة دى
مطلعش كويس وانا اتأكدت من ده..هعامله بحذر شديد جدا لحد ما هو
يفهمنى كويس ويعرف انى مش سذج...لاء يعرف بقا انى طيب
وهناك فارق كبير بين الطيبة.. والسذج
اسف على الاطالة
خالص تحياتى لك..تقبل مرورى.......

جميل ردك يا متر ومقنع تماما تماما ، ورأيك مايختلفش عليه اتنين

شكرا علي تعليقك + مرورك

ليه الردود قليلة كده / أنا في حاجه ماسه لردودكم يا جماعه

شكرا ليكو

اسفة ع التأخير

و بجد معنديش كلام يتقال بعد اللي اتقال دة

شوف يا شاعر كل واحد فينا قال حاجة انت لو عملتهم اكيد هترتاح خالص

يعني صلي ركعتين مثلا و اشكي فيهم لربنا و كلمه و قله ع اللي جوااااك كله

و ادعيه من قلبك و انت هتحس انه سبحانه و تعالي سامعك و شايفك

هتحس بكدة بجد

اشتغل زي سافيكو ما قال اكيد شخصيتك هتتغير بس متخليش الشغل يموت فيك صفات حلوة

انا اختلف مع سافيكو ف النقطة دي

الشغل يقويك ماشي لكن ميقتلش فيك حاجات حلوة

و زي المحامي ما قال كدة حسن النية و الطيبة صفات جميلة

و انا نفسي يمكن عندي الموضوع دة

و ممكن بيجبلي مشاكل كتير

بس حتي لو اللي قدامك مش فهمك كويس و لا قدرك

ربنا بجد مش بيسيبك و مهما كنت مقصر معاه ربنا عمره ما هيسيبك

لانه انت نيتك كويسة و صافية

بس انت بردو كن حذر ف التعامل بقدر الامكان و مع الوقت

طيبتك مش هتتغير بس هتبقي متوقع من فلان كذا و من فلان كذا و بالتالي

صدمتك هتقل و مش هتزعل اوي زي زمان

و بعدين محدش ف الدنيا دي هيعيش دايما مرتاح

لان دوام الحال من المحال

و خد مني البيتين دول للامام الشافعي و انا بحبهم اوي

دع الايام تفعل ما تشاء و طب نفسا اذا حكم القضاء

و لا تجزع لاحداث الليالي فما لاحداث الدنيا بقاء

اتمني اكون ضفت جديد و قدرت افيد

ربنا يوفقك و يكرمك

ميرسي جدا ليكي يا إيجبت ... وبجد أنا مش عارف أقولك إيه علي الإضافة الرائعة دي

دا اللي كنت منتظره من صاحبة الإحساس المرهف الهايل . وشكرا علي الأبيات

مش عارف أقولك إيه تاني / بس ممكن أقولك إنك شاعرة الشباب والإحساس

شكرا علي إضافتك ومرورك الأكثر من رائعين

الله يكرمك و يعزك يا رب

دة كتير دة عليا و الله

بس اتمني بجد اني اكون قدرت افيدك انا و باقي الاراء الجامدة دي

و تكون بقيت احسن

و ابقي طمنا عليك بقي و قلنا طبقت الكلام دة و لا لا

تقبل مروري مرة كماااااااان

أكيد طبعا يا هند إستفدت جااااااامد من الكلام الحلو ده وبشكر كل الناس اللي ردت علي الموضوع

واهو يا مسهل ......... جاري التنفيذ

شكرا علي مرورك