~*¤ô§ô¤*~مــــــآيــــك المــنــتــدى*¤ô§ô¤*~

السلام عليكم

معلش اعذرونى على التاخير

السلام عليكم

معلش اخرت عليكو لظروف خارجة عن ارادتى

اولا نصايحى لمون عشان هيا فى الثانوية العامة السنة دى وعاوزة تدخل هندسة

اولا لازم تكونى بتحبى الرياضيات وشاطرة فيها كمان
لكن نصحتى ليكى بجد انك تحاولى تذاكرى اول باول يعنى ما تخليش الدروس تتراكم عليكى
يعنى تذاكرى الدروس فى نفس اليوم وبعد ما تذكرى الدرس تحلى التدريبات وبعد كده تروحى على الامتحانات
تدورى على اى سؤال جه فى الامتحانات عن الدرس اللى انتى ذاكرتيه
على فكره انا عارف ان الكلام ده صعب قوى بس حاولى
وهاتتعبى جدا فى الاول بس هاترتاحى بعد كده فى المذاكره ان شاء الله
وربنا يوفقك ان شاء الله وتدخلى هندسة واى حاجة انا موجود

اللهم لاتواخذنى بما يقولون واغفر لى ما لا يعلمون واجعلنى خيرا مما يظنون

شكرا ليكى يا عيون وانا ما اقدرش اقول على نفسى انسان متدين ولكن اقدر اقول بحاول ابقى كويس
وربنا يعيننى ويعينكم على فعل الخيرات ان شاء الله

السلام عليكم

ورجعتلكم تانى من جديد
وكل سنة وانتو طيبين بمناسبة شهر رمضان المبارك
طبعا كلنا عارف ان شهر رمضان شهر بركة وخير وهو الشهر اللى نزل فيه القران
وفيه تغلق ابواب النار وتفتح ابواب الجنة ومن خيرات شهر رمضان ايضا
ان ليلة القدر بتكون فى شهر رمضان .....ليلة القدر خيرا من الف شهر
تخيلوا يا جماعة عباده ليلة واحدة تكافئ حوالى 82 سنة عبادة
ومن خيرات شهر رمضان ان ربنا يعتق الرقاب من النار
فاحنا داخلين على فرصة كبيرة اوى لازم ما نضيعهاش من ايدينا
طيب فلازم نستعد لرمضان استعداد تام بمعنى اننا نجتهد فى العبادة اوى فى شهر رجب وشعبان
وده مهم جدا جدا جدا وانتم عارفين عشان نجنى لازم نزرع الاول
يعنى مش هانعرف نتعبد ونجتهد فى رمضان الا واحنا مستعدين فى رجب وشعبان
طيب احنا دلوقتى عدينا النص من شعبان وممكن يكون فى تقصير فى العبادة
يبقى لازم الايام اللى جاية دى نضاعف مجهودنا اوى
يعنى ممكن نصوم ثلاثة ايام الاسبوع الجاى وتلاتة الاسبوع اللى بعده
وممكن اللى عنده همه اكبر يصوم اربعة
واللى عنده همه اكبر واكبر يصوم يوم ويفطر يوم
وكان الرسول صلى الله عليه وسلم يصوم شعبان كله الا ايام قليله
انتم عارفين لية لان اعمال السنة كلها ترفع الى الله تعالى فى شهر شعبان
وكان الرسول صلى الله عليه وسلم يحب ان ترفع اعمالة وهو صائم
ومن اعمال الخير ايضا فى شعبان قراءة القران
وانا بقترح دلوقتى عليكو وعلى كل الاعضاء اننا نختم القران فى الايام اللى باقية دى قبل رمضان
وانا ان شاء الله هابدأ اول واحد باذن الله
ويسلام لو كل يوم ركعتين قيام ليل قبل ما ننام
ويسلام كده لو رحنا لحد فقير واديناله صدقة قبل رمضان
وفى اعمال خير كتيره ممكن تتعمل خلال الايام القليلة الباقية دى
فعلا احنا لو استعدنا كويس قبل رمضان هنجتهد جدا فى رمضان
واحنا بنلاحظ ناس كتير بتبقى مجتهده جدا فى الاول وبعدين تبدا تكسل بعد كده
ليه لانهم اكيد ما استعدوش كويس لرمضان
وياريت يجماعة رمضان السنة دى ميبقاش زى كل سنة
يعنى نجتهد السنة دى اكتر من اى سنة فرصة وجت لحد عندنا
اللهم بلغنا رمضان ..اللهم بلغنا رمضان يارب
ياريت يكون شعارنا السنة دى رمضان بلا مسلسلات
مش عاوزين نضيع وقتنا فى المسلسلات والكلام الفاضى يا جماعة ياريت ناخد بالنا من الحتة دى
ياريت يا جماعة ما نضيعش ولا لحظة فى رمضان
ومش عاوزين يكون ده كلام بس كفاية كلام احنا عاوزين نطبق الكلام ده عملى يا جماعة
ممكن واحد يقول نفسى اعمل كده بس مش قادر لا تقدر والله العظيم تقدر
ابتدى من دلوقتى وقوم يلا كفاية كسل
واللى عنده اى فكره يجماعة بخصوص رمضان ممكن يضفها

اللهم بلغنا رمضان ...اللهم بلغنا رمضان ....اللهم بلغنا رمضان

انا دلوقتى يا جماعة ها ختار العضو اللى هاياخد المايك بعدى
انا هاختار مووووووون

جزاكى الله خيرا يا موووون

ممكن يا جماعة نعمل توبيك خاص نسميه مسابقات رمضان
وكل واحد ممكن يقترح مسابقة نعملها ان شاء الله

فى مسابقة عندى ياريت نقدر نعملها يا جماعة
وهي مين اللى هيقدر يصلى كل الصلوات الخمس فى جماعة ويلحق التكبيرة الاولى لمده اربعين يوم
انتو عارفين جايزة المسابقة دى هتكون ايه
جايزة كلنا هنحلم بيها وكلنا بندور عليها
وهى براءتان براءة من النار وبراءة من النفاق

قال رسول الله صلى الله عليه وسلم ( من صلى لله أربعين يوما في جماعة يدرك التكبيرة الأولى ، كتب له براءتان ، براءة من النار و براءة من النفاق
الألباني في " السلسلة الصحيحة "
تخيلوا يا جماعة لو صلينا اربعين يوم فى جماعة وندرك التكبيرة الاولى هناخد براءة من النار ومن النفاق
انا متهيقلى عمرنا ما هنلاقى جايزة احسن من كده

واسف على الاطالة