كنت بتحب وحبيبتك سابتك ؟

كام واحد ممكن يكون حس ان حياته انتهت بسبب
ان فيه طرف كان فيها وكان جزء اساسي ومشي وبعد عنها ؟ انا مش بتكلم عن
الموت بس بتكلم عن انك تكون / تكوني بتحبي حد اوي اوي وفجأة تبقى قدام أمر
واقع انك لازم تنفصل عنه وتكمل حياتك لوحدك ؟ انا مش عارف لو انت عارف ده
فعلا بس غالبا ده حصلك انت شخصيا ، فيه ناس فينا كملت وعدت الموضوع وناس
اتألمت بشكل مبالغ فيه ، بتحصل ، ممكن تكون حاولت تكلم حد بس واجهتك مشكلة
ان ممكن الناس تتريق عليك ، او ممكن يكون في حد في دماغك مش قادر تنساه مع
انه بعد ومشي وسببلك جرح ومع ذلك انت عارف انك ممكن ترجعله تاني لو بس
حاول معاك

انت ممكن وممكن متكونش ادركت اهم حاجة في الموضوع ، ان
الحب الي بينتهي بانفصال مكنش حب من البداية لانه لو كان الحب ده حقيقي
كان زمانه اكتمل مهما كانت الظروف ، او التحديات او المواقف والمشاكل الي
مريتوا بيها ، محدش فيكم ضحية ومحدش فيكم السبب ، وليام بليك قال ان
الضحية هو الشخص الي بيبقى عارف انه هيتعب وهيفشل ومع ذلك موافق انه يدخل
في تجربة هو عارف اخرتها ايه .. انت تعبت كتير وفكرت كتير وساعات مكنتش
بتعرف تنام ولما كنت بتشوفه تاني من بعيد كان قلبك بيدق ونفسك تجري عليه
وفي نفس الوقت بتبقى عارف ان فيه حاجة مانعاك انك تروحله وده معناه انك
قررت من جواك انك تبعد علشان انت عارف ان القرب بينكم مستحيل بس ديه حاجة
انا وانت عارفينها بس فيه جزء جواك مش راضي يدرك ده لحد دلوقتي لانه مش
فاهم قوانين البشر ومش عارف يتآلف معاها ويصدقها .. الواحد يقدر ، انت
عارف انه يبعد بسهولة ، ويستمر بحياته ويحب تاني وتالت ورابع وعشرين ،
وانت مش مضطر انك تحب تاني وتدور على حب تاني ينسيك حبك الاولاني ، لانك
مش لازم تحب حد تاني علشان تنسى الاولاني ساعات بيبقى لازم تنسى الاولاني
قبل ماتعرف تحب تاني ، علشان كده بتواجه اغلب الناس الي مروا بالمشكلة ديه
مشكلة اكبر ، بيبقى قدامه كذا فرصة للارتباط وبيحاول انه يدخل فيهم بس
بيكتشف انه بيفشل كل مرة وبيرجع السبب للطرف التاني الغير متفاهم او
المجادل او او او ويبدا يقول اسباب ملهاش حصر بس لمجرد انه مش عايز يعترف
انه هو شخصيا مش قادر ينسى .. لما وقعت في نفس المشكلة قابلت واحد وقالي
“وداويني بالتي كانت هي الداء” قولتلها ازاي ؟ قالي حب واحدة تانية وهتنسى
الاولى ، قولتله بس افتكر ده غلط قالي خلاص اشتغل وانجح وانتقم لان احسن
طريقة للانتقام من حد هو انك تنجح وتكمل .. حسيت كان كلامه دخل جوايا انا
مش عارف لو الكلام ده بيلمسك انت كمان ولا لا ، واحتمال انت شخصيا متكونش
عارف بس الواحد مبيبقاش عارف ايه انسب حاجة ليه في كل وقت ، الا بعد
ماياخد قرار وبعد فترة يبص تاني ويقول انا كان المفروض اعمل كذا وكذا ،
احتمال تكون عايز انك تنساه لدلوقتي وتبدأ تاخد حياتك لمكان احسن ، اجمل
وافضل من غيره ، بس انا مش عايزك تعمل ده بسرعة دلوقتي وتاخد قرار دلوقتي
الا لما تكمل قراية ، لو قريت للاخر ساعتها تقدر انك تلتزم بقرارك مهما
كان ولما تلتزم بيه هتكتشف انك وصلت لدرجة الفهم وفي النهاية هتلاقي
الموضوع بسيط وسهل ، انا مش عارف انت هتقرر انك تنسى دلوقتي ولا انك تبدأ
تفهم الاول انت محتاج تنسى ليه ، خليني اسالك سؤال ، ايه الي هيحصل لو بعد
عشر سنين من دلوقتي وبعد ماتكون فهمت وخدت قرار انك تكمل حياتك بقوة ؟
تخيل هتبقى عامل ازاي ؟ بتفكر ازاي ؟ شغلك ، حياتك الاجتماعية النفسية ،
الشخصية سميها زي ماتسميها بس انا عارف انك هتبقى افضل من دلوقتي بكتير ،
خليني اقولك على سر ، الواحد يقدر دايما انه يفهم ولما بيفهم بيبدأ يحس ان
الموضوع بالنسبة له بقى اسهل بكتير ، مش كده ؟ وعلى رأي المثل ، اذا عرف
السبب بطل العجب ، حاجة عاملة زي عجلة بتدور ، ومبقاش ليها فايدة انها
تدور تاني وتيجي انت تدرك انها لازم تقف فبتقولها اقفي ، مش هتقف لانك انت
الي دورتها من البداية ، لازم تدخل منك علشان تبدأ توصلها فكرة انها لازم
تقف وان مهمتها انتهت ساعتها هتبدأ تهدى لحد ماتوصل انها تقف تماما وبأمرك
هتدور تاني من اول وجديد بحب جديد وبفكر مختلف ، لانك لو حاولت انك تودي
العجلة لاتجاه مختلف ، هتروح للمكان الي انت عايزه بس ساعتها لو كانت
دايرة بفكرة قديمة هتبقى قوة الدفع بتاعتها الفكرة القديمة لانها لسة
مماتتش ومنتهتش فلما توصل للمكان الي تحدده هتحس ان ده مش مكانها لان
الشخص ده مكنش موجود من البدايه

انا موافقك انه صعب النسيان لاني جربت بنفسي ، بس كل حاجة صعبة بتبقى سهلة في النهاية لما بنكتشف اننا حققناه فعلا صح ولا لا؟

علشان
الي مبيموتكش بيقوك فده معناه انك تقدر دايما تتحسن من اي اثر لاي علاقة
قديمة ومن اي حد اذاك واذى مشاعرك و زي ماحصل في حياتك قبل كده انك انفصلت
عن حد كان اهم في حياتك فانت عارف انك بسهولة تقدر تنفصل وتنسى تماما
الشخص الي انت عارف انك المفروض تنساه ، لانك لما بتنساه دلوقتي حالا
بتبدأ تحس من جواك ان مممم كان المفروض ده يحصل من زمان ، وساعتها لما
بتعرف انك نسيته بتلاقي ان الحياة بقت اسهل وبتعرف انك تبدأ تفكر في حد
جديد او هدف جديد لنفسك ، حتى هتعرف تختار كل الي انت عايزه بنفسك وتعيش
الحياة الي بتختارها بنفسك وتختار الالوان الي بتحبها سواء كانت احمر او
اخضر او اصفر انا شخصيا افضل ليك الاحمر

وبعد كده حاول تفتكره تاني
، حاول على اد ماتقدر ، حاول معلش بس حاول تاني جرب حاول تفتكر اي موقف
بينه وبينك ، الموضوع بيصعب كل مرة ، وكل مرة بتفتكر موقف بتكتشف انه فقد
اهميته بالنسبة لك لانك بتقرر انك تنساه والنسيان ده في حد ذاته قرار
العقل خدته ووصله للعجلة الي بتدور بسببه وبتبدأ العجلة تقف ولو حاولت انك
ترجع الفكرة تاني علشان العجلة تتحرك تاني هتكتشف ان الفكرة مش كفاية وان
العجلة مش هتدور لنفس الشخص مرتين ، انا مش عايزك تنسى لان النسيان مش هو
الحل بس ساعات بنكتشف اننا نسينا من غير مانقرر ننسى مين وفين وامتى وازاي
ننسى دلوقتي ولا بعدين وليه نحاول ننسى والنسيان نفسه شىء عادي جدا بيحصل
كل لحظة وكل يوم ، كل ثانية وكل دقيقة بننسى بننسى ناكل ساعات وبننسى
حاجات مهمة جدا وبتنسى .. اقرب الناس ليك وبتنسى انك تعمل اي واجب عليك
وبتنسى وبتبقى عارف انك فعلا نسيت … حاجات مبتتنسيش

خليني اقولك
فزورة ، لو قدامك تلات احبال مربوطين بعقدة (جمع حبل) ومحتاج انك تقطع
العقدة الي بينهم ، هتختار ايه تقطعهم بيه ؟ هتختار عقلك ولا السكينة ؟ ….
مش محتاج تفكر كتير … عقلك .. لانه هيقولك تختار السكينة الي هتقطع بيها
الحبل وتخلي التلات احبال لوحدهم بشكلهم الطبيعي الي كانوا عليه

مفيش مشكلة ملهاش حل ومفيش سبب يخليك تحتفظ بحاجة انت عارف انك مش محتاجها
ولازم تتخلص منها دلوقتي ، قبل كده كنت ماشى فى الشارع ، قابلت واحده
صاحبه مامتى و صاحبتى انا جدا جدا جدا ، ربنا يديلها طوله العمر ، كانت
جايه تزورنا وكان شكلها يختلف عن كل مرة شوفتها فيها و قالتلى مالك
قولتلها على الي حصل قالتلي انك هتقدر تتغلب على المشكلة ديه مع الوقت
وهتتعلم منها .. حسيت ساعاتها انها مجرد بتساعدني علشان انسى بس افتكرت
كلام الطرف التاني لما قالي في اي حاجة قالهالي قالي متفتكرش اني هفكر في
الي هتفكر فيه ، لاني فعلا بدات افكر بفكر مختلف تماما عن الي كنت بفكر
بيه … حاجة وحشة مش كده برضه بقولك تاني انك بتتحسن مع كل يوم يعدي عليك
بتعرف انك اقوى من اي حد تاني غيرك قالتلي نفس الكلام وبقيت احكيلها القصة
لما انتهيت منها قالتلي غريبة ان الواحد يتمسك بالشر ويدعي في نفس الوقت
ان ربنا يحميه منه … قولتلها ايه القصة ؟ قالتلي

من الوف السنين
كان بيعيش مخلوق اليف ، بش شكله مخيف ، كانت الناس بتهرب منه وكان عباس
اسمه وسنه اكتر من 300 سنة ، في الوقت الي الناس كانت بتعيش فيه كتير ،
كان فيه امير بيحكم البلاد ، امر الوزرا والعباد انهم يجيبولوا المخلوق
لحد عنده يستجوبه انت ليه شكلك كده ، رد عليه بالشكل ده … “انا من سنين
كنت اجمل الناس ، لحد ماقابلت حد خنته وسبته ولما سبته لعني ، وبقى شكلي
كده ..” ولأن كل واحد يقدر انه يسيب زي ماقدر انه يمسك فالمخلوق اختار انه
يسيب لما عرف انه مكنش يقدر يكمل ويمسك ، بس التاني مفهمش ده ، رد الامير
وقاله والي يكسرلك لعنتك ويخرجك ؟ قاله احبه وابقى دايما معاه في اي مكان
يبقى فيه .. قاله غمض عنيك وتخيل نفسك مقابلتوش من زمان ، وماقد كان يظل
في الحسبان … صحي عباس وعرف انه مبقاش مجرد مخلوق ضعيف ولا حتى حد شكله
مخيف ، بقى جميل ومبسوط وحضن الامير وقاله .. انا مكنتش ملعون ، انا الي
خليت اللعنة ليها قوة عليا لما مسكت فيها وقررت اني اتبناه واعيشها واعيش
جواها ولما سمعتك بتتكلم فهمت سر مكنتش فاهمه من زمان …

سالته وايه
الرابط بيني وبين القصة ؟ قالي احتمال متكونش عارفه دلوقتي بس انا متاكد
انك هتعدي عليك لحظة وهتفهم ايه كان الرابط وساعاتها هتعرف ايه الي
هتختاره علشان تفك الربط بيه ..

واحتمال انت كمان تكون عرفت ازاي
تقدر تفك الربط الي بينك وبين اي حد لازم تنساه ، واحتمال متكونش ادركت
لسة الطريقة لكده بس جواك في مكان ما فيه حاجة فهمت واقتعنت وهتبدأ تاخد
موقف وقرارات ، انا مش عارف انت هتحس بالاختلاف دلوقتي ولا من اول
النهاردة ولا لما تنام وتغمض عنيك وتصحى وتحس انك بقيت فاهم اكتر وعارف
اكتر عن حياتك …

نصيحتي ليك انك تسامح وافتكر دايما الذكريات
الكويسة مهما كانت ساعتها اي الم هتحس بيه هيختفي وهتكتشف ان اللعنة
انكسرت والعقدة انحلت ورجعت لنفسك زي زمان احسن واجمل واقوى من اي وقت تاني

و انا اسف لو كنت طولت عليكم

يالهوي ياحسين انت بجد انسان تحفه وانا استفدت من كلامك اوي وربنا يوفقك وتقدر تخرج من اللي انت فيه حاول تدور حواليك من جديد واكيد هاتلاقي الانسانه اللي تستاهل حبك وتقدره

ايه الجمال ده

كلام فى منتهى العقل

ياريت الكل يستفيد

بجد يا حسين ربنا يسعدك

توبيك اكثر من رائع

تسلم وتقبل تحيتى

مون
ميرسى ليكى ولذوقك ربنا يخليكى

ثناء
ربنا يخليكى يا ثناء
تسلمى
و نورتو التوبيك

بجد تحفة يا حسين
هو حجم التوبيك ميشجعش ع القراية ههههه
بس بجد اللي هيقرا ف البداية باقي التوبيك هيشده
تسلم الايادي

HAYEL BEGAD YA S7S
كلام جامد بجد وربنا يوفقك و تلاقى حبيبة قلبك
هههههههههههههههه

انت دماغ
رهيب التوبك دة ياحسين
انا الحمد لله حصلتليش الحاله دى بس حسيت باللى قولته
ربنا يوفقك

جامد جدا وتفكيرك عاقل جدا

واحساسك عالى

بجد توبيك روعة

ميلانو
معلش هو التوبيك طويل فعلا بس معلش بقى نورتنى يا مان

لوف بوى
نورت يا ريس وميرسى ليك وقول يا رب

سما
ميرسى ليكى ولذوقك منوره التوبيك والمنتدى كله واهلا بيكى

ويكا
تسلم يا صديقى ربنا يخليك نورت

ميرسى يا جماعه ليكو كلكو نورتونى بجد

ياااااااااااااااااااااااااااااة والله كلام فعلاهزالمشاعروفى نفس الوقت بيفوق للصح مش عارفه اقولك ايه بس انا مريت بالتجربه دى فعلشان كده الكلام هزنى بس الحمدلله انا عرفت افوق منها اتمنالك اجمل سعاده باذن الله والاختيارالافضل وربنا يكرمك

عيون
ميرسى ليكى ولمرورك ولزوقك
ربنا يخليكى
ميرسى
نورتى التوبيك واسعدنى مرورك

بجد توبيك هايل ولازم كلة يقراة ويستفيد منة
لان فى ناس كتيرة واقعة فى المشكلة دى ومش لاقية حل
ربنا يوفقك وتلاقى البنت اللى تستاهلك
NiCe Ya 7uSSin

ماجيك
ميرسى ليك ربنا يخليك
اسعدنى مرورك
نورتنى يا مان

ايه الجمال ده يا حسين بجد توبيك اكتر من رائع
ومؤثر جدا جدا
ومفيد خالص
تسلم ايدك يا ريس

توبيك حلو يا حسين تسلم ايدك

فالنتينو
تسلم على المرور نورت التوبيك واتمنى تكون استفدت منو

جوكر
تسلم يا ريس نورت التوبيك

تسلمو على مروركو الجميل