بابا مضايقك؟ ماما مضايقاكى؟ تعالوا نغيرهم!!!!!!!!!

بصراحه العنوان ده لاقيته موجود علي النت و شدني جدا بس لما قريت الموضوع
عجبني بصراحه فقلت لازم انقلهلكم و ياريت يا جماعه تقولوا لي رايكم في
الموضوع

.
بابا مضايقك؟ ماما مضايقاكى؟ خلاص من النهارده كل
الكلام ده هيتغير، عرض خاص جداً ولمدة محدودة من شركة (فاميلكو) دلوقتي
تقدر تختار أهلك علي مزاجك، إيه مش مصدق؟ لأ بجد لازم تصدق، دلوقتي تقدر
تبعت لنا كل المواصفات اللي نفسك تشوفها في والدك أو والدتك وبعد أسبوع يتم
التبديل، ولو طلبت تغيير الإتنين هتاخد عليهم أخ أو أخت هدية من اختيارك،
يللا مستني إيه قوم بسرعة اتصل على .....0900".

هااااه... إيه رأيك؟
أكيد بكره هنلاقي كتير واقفين في طوابير مستنيين دورهم عشان يحجزوا، تفتكر
العرض ده لو كان بجد كنت قدمت؟
أنا متأكد إن ناس كتير قوي ممكن يجاوبوا
بلأ بس لو كان قدامهم الفرصة دي كانوا هيقدموا وهيحاولوا على قد ما يقدروا
إنهم يغيروا أهلهم.

طيب إيه رأيك بقي إن العرض ده فعلاً موجود، ومش
بس موجود ده موجود من غير حجز ولا غيره، والشركة مقرها الرئيسي عنوانه هو
عقلك.

لأ ما تفهمنيش غلط إحنا هنا مش هنناقش ولا هنحكى في كلام
سمعته قبل كده كتير، الموضوع إني جاى أبيع لك منتج ومش عاوز منك غير خمس
دقايق... بس قبل ما أبتدى أحكي لك عن المنتج، لازم الأول نتفق إنك هتدينى
فرصة وتجرب المنتج بتاعي وما تحكمش عليه من غير ما تجربه، موافق؟
لو مش
موافق اطلع من دلوقتى وسيب بابا وماما زى ماهما

الموضوع بكل بساطة
بيتقسم لـ 3 أجزاء:
الجزء الأول، وهو تحب أهلك الجداد يبقوا عاملين
أزاي؟
الجزء التاني، طريقة التبديل
الجزء التالت و الأخير، هو ميعاد
الاستلام و الصيانة.
نبتدي بالجزء الأول وهو إجابة للسؤال؛ إيه هي
المواصفات اللي نفسك تبقى موجودة في باباك و مامتك؟ دي يا سيدي قايمة
بالمواصفات اللي ممكن تتوفر فيهم :
1.يكونوا بيحبوك
2.لما تحتاجهم
دايماً تلاقيهم
3.لا يقولوا لك رايح فين و لا جاى منين
4.يعملوا لك
كل اللي إنت نفسك فيه
5.يبقوا بيخافوا عليك
6.ما يتدخلوش في حياتك و
لا قراراتك
7.يدولك حرية كاملة في المواضيع اللي تتكلم فيها معاهم أو
قدامهم
8.يحترموا وجودك و ما يستهتروش بأفكارك
أعتقد دول أهم الحاجات
اللي تحب تكون في باباك ومامتك

طيب الجزء التاني وهو إزاي إحنا
هنبدل أهلك ونديلك عيلة جديدة علي مزاجك. الموضوع سهل وبسيط جداً، دلوقتي
لو بصينا علي الحاجات اللي نفسك تبقى موجودة في باباك ومامتك هنلاقي مثلا:

إن
موضوع إنهم يكونوا بيحبوك دي سهلة جداً لأنها أصلاً كانت موجودة عند باباك
ومامتك القدام.

سيبك من دي لو شفنا حكاية إنك لو احتجت لهم
هتلاقيهم، طيب ما برده دي موجودة عند القدام، لأ.... صدقني موجودة، طيب
إزاي إنت قاعد دلوقتي على النت عارف تقرا المكتوب، لما احتجت إنهم يأكلوك
ويشربوك ويعلموك ويفهموك ويدولك حاجة تخليك قادر تعرف عن أي حاجة في أي
حتة،

طيب مش ممكن تكون إنت السبب إنهم في الحاجات التانية الصغيرة
دي مش واقفين جانبك؟ رحت حكيت لهم عن مشكلتك؟ طيب وأنت رايح تحكى بصيت ولو
ثانية هو أو هي كانوا عاملين إزاي؟ متضايقين ولا متعصبين؟ أو يمكن عندهم
شغل كتير فعشان كده ما ردوش عليك؟ جربت تروح لهم مرة تانية؟

وحكاية
إنك عاوزهم يخافوا عليك وفي نفس الوقت ما يسألوش فيك، طب دي نعملها إزاي
دي؟ ما هو معنى إنهم يخافوا عليك إنهم لو إتأخرت يكلموك يطمنوا عليك، مش
لازم يعنى يكون معناه تصغيرك قدام صحابك.

فاضل حكاية إنهم ما
يتدخلوش في حياتك ولا قراراتك، وفي نفس الوقت يسمعوك ويحترموا كلامك
وأفكارك، لما إنت عاوزهم يا أخي يسمعوك ويحترموا أفكارك، طيب ما تقول لهم
إنت بتفكر أزاي في حياتك ومستقبلك. مرة إنت تقنعهم ومرة هما يقنعوك، وفي
نفس الوقت هما كمان ثقتهم فيك هتزيد قوى والمواضيع اللي ممكن تتكلموا فيها
هتزيد جداً فتبقوا أهل وكمان أصحاب وحبايب.

أما موضوع يعملوا لك كل
اللي نفسك فيه أكيد من حقك إنك يبقى ليك طلبات وواجب عليهم إنهم يعملوها لك
بس برضه ما تنساش وأنت بتطلب النهارده أحسن جزمة وأحسن موبايل إنك بتاخد
من رصيد بكره اللي هتطلب بيه أحسن عربية وأحلى شقة، وما تنساش والدك
ووالدتك جت لهم الفلوس إزاي، هي تقريباً بالظبط شبه إزاي إنت بتنجح في
الامتحانات، أيام و ليالي طويلة كلها مذاكرة و تعب، تحس بإيه إنت لما تعبك
ده تلاقيه مرمى في الزبالة ولا مُهمل كده في أي حتة ولا حد مقدر إنت تعبت
قد إيه.

ينا بقى يا سيدي لآخر جزء، بتاع ميعاد التسليم
والصيانة، الميعاد ده هيبقى في نفس اللحظة اللي إنت رحت تكلمهم فيها و تفتح
معاهم صفحة جديدة وتبتدى تبيع لهم العرض زي ما اتفقنا، أما الصيانة بقى فا
دي عكس أي جهاز تانى، الصيانة في أول شهرين مهمة جداً،
يعنى لازم تروح
تكلمهم في أي حاجة في الفترة الأولانية دي، كلم والدك في الكورة، كلمي
والدتك في الموضة، أقعدي مع والدك ساعة في اليوم وأسمعوا عبد الحليم، أقعد
مع والدتك ساعة في اليوم تقول لها إزاي إن كل الستات الوقت بيكبرهم وهى
الوقت بيصغرها، وصدقني كل ما تقلل الحواجز اللي بينك وبينهم من ناحيتك
هيحصل نفس الموضوع من ناحيتهم.

على فكرة "البضاعة المباعة لا ترد
ولا تستبدل"...

للفاشل صفتان، لا يسمع سوى نفسه، ولا يسمعه أحداً
سواه

(* _*) منقول

اولا ربنا يحميكى ويجزيكى خير

لانك قصدى النصيحة فى موضوع

اشبه بالحفرة كل شوية تكبر

وفعلا الحوار والصداقة الاسرية

هى الحل السحرى لكل مشاكل البيوت

انا الحمد لله ماما صحبتى جدا

ربنا يحفظ كل الاباء والامهات

ويوفقنا وتقبلى مرورى

سناء حبيبتى
ربنا يكرمك يا قمر
فعلا دى مشكلة كل واحد او واحدة بيواجهوها مع اسرتهم
خصوصا فى فترة المراهقة
والنتايج بقى بتبقى بردة على حسب تعاملنا مع الموضوع
دايما شايفين ان هما اللى لازم يفهمونا
هما اللى لازم يحسوا بينا
هما هما هما
لكن احنا مالناش دور غير دور الضحية
لا
احنا نقدر بردة نغير
والله لا يغير ما بقوم حتى يغيروا ما بانفسهم
يبقى لازم احنا الاول اللى نتغير
وبعدين نغير اللى حوالينا
لاننا عمرنا ماهنغير حاجة لو احنا ماتغيرناش
وربنا يكرمك يارب ياقمر
ويدوم عليكى سعادتك ومحبتك لبيتك واسرتك يااااارب

جزاكم الله كل خير( بسى ابقى كملى الرقم من فضلك)

ضمان كام سنة يا لحن

وياتري الاب والام كوري ولا صيني

الواحد لو لف العالم كلة والدنيا كلها مش هيلاكي زي باباة او مامتة
في حنيتهم وفي طيبتهم وفي حبهم وخوفهم عليا
ربنا يخليهملي

موضوع هايل يا لحن تسلم ايدك

مشكوررررررررررررررررررة يا لحن
ع التوجية الى لغة الحوار
مع الاب والام
فعلا موضوع شيق
جدير بالقراءة
نيس يا لحن

كات ومن
هههههههههههه
ضحكتينى وانا متضايقة
ابقى حطى الرقم اللى انتى عاوزاة
اصلى اختيارى مش اجبارى

ستايل نورتنى

بيبيتو
شكرا على زوقك

ربنا يباركلك ف باباكي ومامتك وانا كمان ربنا يباركلي فيهم عشان ملهمش بديل اساسا!!! حد يبدل اهله ده معندوش دم

والله يا لحن موضوعك جميل
وانا قررت اشترى من النهارده
وانا مسول عن اى عطل لانه هيكون بسببى